"O'zbekiston Kubogidagi o'zim ishtirok etgan birinchi finalni yaxshi eslayman. O'sha yili chempionlikni boy bergan bo'lsak-da, kubok finalida “Navbahor”ni 3:0 hisobida mag'lub etgan edik. O'sha o'yinda 2-golga mualliflik qilganman. Eng esda qolarli final deb 1997 yilgi “Paxtakor”-“Neftchi” uchrashuvini aytgan bo'lardim. Uchrashuvning asosiy vaqti tugashiga 4 daqiqa qolganda biz hisobni tenglashtirganmiz – 2:2. Qo'shimcha taymlar belgilangan. O'sha paytda “oltin qoida” amal qilar, yani kim qo'shimcha vaqtda to'p kiritsa o'yinga yakun yasalar va o'sha jamoa g'olib deb elon qilinardi. “Neftchi”da juda qulay imkoniyat bo'lgan va ular gol urganlarida g'olib deb topilardilar. Lekin omad biz tomonda bo'lgan. Uchrashuv yakunlanishiga 2 daqiqa qolganda Andrey Akopyanc tomonidan kiritilgan to'p bizga kubokni taqdim etgan.

2003 yilgi “Nasaf” bilan final ham yodimda qolgan. O'shanda 2-bo'limda maydonga tushgandim. “Paxtakor” 2:1 hisobida oldinga borayotganiga qaramay, qarshiliklar hujumga zo'r berishgandi. 84-daqiqada men hisobni 3:1 ga etkazganimdan keyingina, ular taqdirga tan berishgandi.

Bu yilgi finalga keladigan bo'lsak, mutaxassis sifatida “Nasaf”ning imkoniyatlari yaxshiroq deb hisoblayman. Sababi, jamoaning hozirgi o'yini yaxshi shakllangan, tarkib bir necha yildan beri stabil bo'lgani uchun o'yinchilar maydonda bir-birlarini yaxshi tushunishadi. Ular yarim finalda “Lokomotiv”dan ustun kelganlari ham ko'p narsani anglatadi. Lekin “Bunyodkor” irodali jamoa ekanini ham unutmaslik darkor. O'tgan yili Osiyo chempionlar ligasi guruh bosqichining so'nggi turida safarda “Al Jaish”, shuningdek, bu yilgi saralash bahsida “Al Jazira”ning ustidan qozonilgan irodali g'alabalar fikrimga dalil bo'la oladi. Aytmoqchimanki, men bilgan “Bunyodkor” o'z irodasini ko'rsata olsa, “qaldirg'ochlar” o'z maqsadlariga erishishlari mumkin.

Tilagim, kubokni kim olishidan qatiy nazar, OCHL musobaqasida yurtimiz sharafini munosib himoya qilishsin. Bu yil birorta ham klubimiz guruh bosqichidan chiqa olmagani, qitadagi reytingga salbiy tasir ko'rsatdi. Shu boisdan ham maqsad faqat mamlakat kubogi emas, qitada ham munosib ishtirok bo'lishi lozim!", - deydi Mirjalol Qosimov.

Shahboz Beg'amov suhbatlashdi.

Mirjalol Qosimov: "Maqsad faqat kubok emas, qitada ham munosib ishtirok bo'lishi lozim!"