2020 yil yakunlariga ko'ra, "O'zbekistonning eng yaxshi futbolchisi" deb topilgan Jaloliddin Masharipov Saudiya Arabistoniga yo'l olishi kutilgandi. Saytimizda u hatto tibbiy ko'rikdan o'tdi, tez orada "Al Nassr" bilan shartnoma imzolaydi degan xabar ham chiqdi.

Biroq nimadir bo'ldi-yu, ushbu transfer amalga oshmadi. Bizga malum bo'lishicha, Saudiya Arabistonining "Al Nassr" klubiga taqiq qo'yilgan va hech qaysi futbolchini transfer qila olmas emish. Lekin bu qanchalik to'g'ri yoki noto'g'ri bunisi qorong'u.

Bugun "Jaloliddin Masharipovning Saudiya Arabistoni klubi bilan shartnoma imzolamagani..." sarlavhali so'rovnoma yakunlariga to'xtalib o'tamiz. O'tgan vaqt mobaynida mazkur so'rovnomada 10 mingdan ziyod o'quvchi ishtirok etib, eng ko'p 41 foiz ishtirokchi "Yaxshi bo'ldi, endi Evropaga ketadi" degan variantda to'xtalgan.

28 foiz o'quvchi "Yomon bo'ldi, endi legioner bo'la olmasa kerak" degan variantni tanlagan hamda 24 foiz ishtirokchiga "Yaxshi bo'ldi, yana "Paxtakor"ga qaytadi" varianti maqul kelgan. Faqat 7 foiz o'quvchigina "Yomon bo'ldi, "Al Nassr" kuchli klub edi" degan variantga to'xtalgan.

So'rovnoma yakunlari haqida nima deyish mumkin? Avvalo shuni aytish kerak, Saudiya Arabistoni chempionati Osiyoda etakchilar qatorida turadi va ularning chempionatini Qatar yoki BAA ligalari bilan solishtirish kerak emas. Qolaversa, "Al Nassr" ham kuchli jamoa hisoblanadi, axir bu klubda Abderazzaq Hamdallah singari to'purar bejizga o'ynayotgani yo'q.

Aytaylik, bu transfer amalga oshmagani bilan Masharipov Evropaga ketsa, bundan yaxshisi yo'q. Lekin yana O'zbekiston chempionatiga qaytsa, bu ortga qadam tashlash bo'ladi. Uzun quloq gap-so'zlarga qaraganda mohir yarim himoyachi Qatarning "Al Sadd" klubi bilan shartnoma imzolar emish. Lekin bu qanchalik haqiqat, albatta vaqt o'tib bilib olamiz.

Masharipov haqida berilgan so'rovnoma yakunlari