Dastlab hisobda ortda borayotgan maydon egalari so'nggi daqiqalarda hisobni tenglashtirdi. Birinchi bo'lim yakunlanishiga yaqin oradagi farqni qisqartirgan Marko Kolakovich o'yindan so'ng saytimizga fikrlarini bildirdi.

- O'yin haqida...

- Oson o'yin bo'lmasligini bilib turgandik. "Paxtakor" bilan hamma jamoa qiynaladi. Ular mamlakatning amaldagi chempioni hisoblanishadi. Uchrashuvga kelsak, dastlabki 25-30 daqiqada nima uchundir o'zimizga o'xshaganimiz yo'q. Qo'pol xatolar evaziga darvozamizdan 2ta to'p olib chiqdik. Muhimi tanaffusga qadar jamoamiz bitta gol urdi. Bu ikkinchi bo'lim oldidan juda muhim edi. Bahsning ikkinchi yarimida o'yinni nazorat qilidik, vaziyatlar yaratdik. Oxirigacha kurashib haqli bir ochkoni qo'lga kiritdik, deya olaman.

- Siz aytgan kamchilik "Qizilqum" bilan uchrashuvda ham yuz bergandi. Umuman jamoa o'yinning ilk daqiqalarida raqibga imkoniyat berib qo'ymoqda...

- "Qizilqum" bilan kechagi o'yinni solishtirib bo'lmaydi. O'shanda bizda charchoq alomatli sezilgandi. OFK kubogida 3ta muhim bahsni o'tkazib qaytgandik. Bunday qisqa vaqtda tiklanib ulgurish imkonsiz. "Paxtakor"ga qarshi esa juda katta ishonch bilan maydonga chiqdik. Shuningdek raqibni haddan ziyod hurmat qilgan holda o'ynadik. Bu o'z so'zini aytdi.

- Bu OFK kubogida "Xo'jand" bilan bahsda jamoaga minus keltirmaydimi?

- Kechagi bellashuvni jamoamiz bilan tahlil qilamiz. Bu xato takrorlanmasligi uchun yanada etiborliroq bo'lishimiz darkor.

- Ulug'bek Baqoev tanaffusda qanday ko'rsatmalar berdi?

- Ko'rgan bo'lsangiz, ikkinchi bo'limga katta ishtiyoq va xohish bilan maydonga tushdik. Murabbiy oxirigacha kurashish kerakligini aytdi.

Abdulaziz Iskandarov yozib oldi

Marko Kolakovich: "Paxtakor" bilan o'yinda haqli bir ochkoni qo'lga kiritdik"