Ehtimol, u oxirgi omadsizliklar (xususan, Amerika kubogi finalida penaltilar seriyasida gol urolmay, terma jamoa bilan sovrin yutish imkoniyatidan yana foydalanolmadi) tasirida shunday yo'l tutgandir. Umuman, Leo sochini oq-sarg'ish rangga bo'yagan yagona futbolchi emas. Boshqacha aytsak, imidjni shu tariqa o'zgartirish futbol yulduzlari orasida o'ziga xos urf hisoblanadi. Marhamat, faqat oxirgi vaqtlarda mallasochga aylangan yigitlar bilan tanishib, zamonaviy futbolda sariq rang juda qadrlanishiga iqror bo'lishingiz mumkin.

Fyodor Smolov

Rossiya terma jamoasi hujumchisi Fyodor Smolov o'z sochini oq-malla rangga bo'yab, katta shov-shuv ko'tardi. Biroq jamoatchilikning munosabati nisbatan salbiy bo'ldi. Ayniqsa, Roman Shirokov baho berishni paysalga solmadi va hazil ohangida Smolovni tannoz yigitga chiqardi-qo'ydi. Umuman Fyodor bu kabi tanqidiy qarashlarning barchasini yuzida tabassum bilan o'tkazib yubordi, biroq otasi sochini asl holiga qaytarishi zarurligini tayinlaganida, shunchaki, ko'ndi. Qisqasi, imidjini o'zgartirib xato qilganini tushundi, shekilli.

Aaron Remzi

Aaron Remsi Evropa chempionati-2016 oldidan sof mallasochga aylandi. Uelslik yarim himoyachi shuning barobarida soqolini tabiiy rangida qoldirdi. Nega? Shunchaki, soch va soqolim rangi o'zaro uyg'unlashib, yanada dahshatli ko'rinishini istadim, - deya izoh berdi Remzining o'zi. Endi malum bo'ldiki, Aaronning yangi qiyofasi kutilgan effektni berdi. Axir kamtarin Uels terma jamoasi Evro-2016 yakunida bronza medalini yutdi, Remzi esa bu yutuqqa mazmunli o'yini va bitta goli bilan munosib ulush qo'shdi.

Neymar

Barselona yulduzi - Neymar deylik, Aaron Remzining mutlaqo aksi. Chunonchi braziliyalik futbolchi faqat soqolini bo'yab, sochiga teginmadi. Neymar Rojdestvo arafasida Santa-Klaus qiyofasiga kirish maqsadida shunday qildi, chog'i. To'g'ri, u sochini ham malla tusga olib kirgan, biroq oldinroq. Eslasangiz, Neymar o'z yurtida o'tgan jahon chempionatini mallasoch sifatida qarshi olgandi.

Dani Alvesh

JCH-2014da Neymardan tashqari, uning jamoadoshi Dani Alvesh ham aynan sarg'ish soch turmagini tanladi. Aniqroq aytsak, himoyachi hujumchidan farqli o'laroq, bu ishga guruh bosqichi 2-turi oldidan qo'l urdi. Xullas, Dani Alvesh Meksika termasiga qarshi bahsga yangi imidjda tushdi.

Maruan Fellayni

Belgiya terma jamoasi yarim himoyachisi Maruan Fellayni ham aynan Evropa chempionati munosabati bilan sochiga boshqacha tus bag'ishladi. Manchester Yunayted aslida afro uslubidagi katta va qop-qora soch turmagiga moyil, Franciyada ham jingalak sochini kaltaytirgani yo'q. Biroq yangi uslub - oq afroni kashf etdi. Umuman, belgiyalik futbolchi tanlagan rangni to'g'ri anglatadigan ibora jahon enciklopediyasida ham bo'lmasa kerak.

Antuan Grizmann

Evro-2016da Franciya terma jamoasi bosh yulduzi maqomini olgan Antuan Grizmann uchun boshidagi tuklarga turlicha jilo berish odatiy yumush hisoblanadi. Aytishlaricha, hujumchi o'z soch turmagini bo'yashni 7 yoshidayoq boshlagan ekan, shunday bo'lgach, uning oq-sarg'ish tusli ijodi birovni hayratga solmasligi kerak.

Samir Nasri

Manchester Siti yarim himoyachisi Samir Nasri o'tgan mavsumning yakuniy qismida mallasoch bo'lishni istab qoldi. U yangi soch turmagini ilk marta Angliya premer-ligasi 33-turi doirasida Vest Bromvichga qarshi kechgan o'yinda reklama qildi. Muxlislar shundan so'ng Samirni hattoki, mashhur pop-xonanda Mayli Sayrusga o'xshata boshlashdi.

Serxio Ramos

Real himoyachisi ushbu ro'yxatga tushgan hamkasblaridan ajralib turadi. Gap shundaki, u qolganlardan farqli ravishda, havas uchungina mallasochga aylanmagan. Xullas, Serxio bu ishga aniq maqsadni ko'zlab jazm etgan. Gap shundaki, u sochining rangi tufayli maktabda doimo kalaka ostida qoladigan bir mallavoy bolakayni qo'llab-quvvatlash maqsadida boshiga bo'yoq surtgandi. Aytgancha, Serxioning bu xatti-harakati jamoatchilik tomonidan munosib olqishlandi.

Pol Pogba

Pol Pogba ham tashqi qiyofasini o'zgartirishdan sira charchamaydi. Xususan, soch turmagi masalasida turli kashfiyotlarga qo'l urishdan aslo cho'chimaydi. Aytish mumkinki, Pol o'z boshini allaqachon o'ziga xos sanat asariga aylantirib ulgurgan.

Xames Rodriges

Realning kolumbiyalik yarim himoyachisi Xames Rodriges mallasoch bo'lishga qaror qilgan oxirgi futbolchilardan biridir. To'g'ri, bu ijoddan uning ko'ngli uncha to'lmadi chog'i, atigi bir haftadan so'ng sochini yana boshqa rangga bo'yadi.

A.AHMEDOV tayyorladi

Mallasochga aylanish operaciyasi