- O'yin haqida fikringiz?

- O'ylaymanki, bugungi o'yin muxlislarga yoqdi. Men doim bir gapni aytaman: biz muxlislar uchun o'ynaymiz. Qiziq uchrashuv guvohi bo'ldik, ettita gol ko'rdik, penalti belgilandi, xavfli vaziyatlar ham ko'p bo'ldi. Bitta o'yin uchun bularning bari etarli deb o'ylayman. Lekin bunday uchrashuvlarni o'tkazish murabbiy uchun oson emas. Doim diqqat bo'lasan, sochingga oq tushadi. Muxlislar esa maza qiladi. Lekin baribir futbolda eng muhimi - ishqibozlarning xursand holda uyga qaytishi.

- Usmonali Ismonaliev oxirgi o'yinlarda oldingi chiziqda harakat qilyapti. U o'zini qanday his qilyapti?

- O'yindan oldin unga vinger sifatida foydalanmoqchi ekanimni aytgandim Lekin qo'shimcha sifatida o'yindagi vaziyatga qarab o'rta chiziqqa o'tsa bo'lishini ham uqtirgandim. Maydon markazida Jo'raqo'ziev, Abdumannopov, Ismonaliev - triosi bemalol joy almashib o'ynashi mumkin. Chunki ularning uchalasi ham maydon markazi yoki qanotlarda o'ynay oladi. Shunday bo'ldiki, bugun Usmonali ikkita gol urdi va bu bilan jamoa g'alabasiga hissa qo'shdi. Buning uchun xursandman.

- Sunnatillo Hamidjonovda bosim ko'pdek ko'rinyapti.

- Men unda qandaydir bosim bor deb o'ylamayman. To'g'ri, bugun birinchi daqiqalardayoq o'zini yo'qotib qo'ydi. O'zi bilan gaplashib ko'rgach nima ro'y berganini o'rganamiz. Lekin bilishimcha, unda hammasi joyida bo'lishi kerak.

- Markaziy va qanot himoyachilaridan ko'nglingiz to'ldimi?

- Uchta gol o'tkazganimizni hisobga olsak, himoyachilar o'yinidan qoniqdim deya olmayman. Ammo hech kimni ayblamoqchi emasman. Chunki men har doim hamma hujum qiladi va hamma himoyalanadi deb aytaman. Bizda falonchi adashdi, pistonchi xato qildi degan gaplar yo'q. Futbol bu - jamoaviy o'yin. Shuni aytishim mumkin, uchala golni ham o'zimizga o'zimiz olib keldik.

- Abdug'aniev bilan Sohibjonov nima uchun U-21 jamoasiga o'tkazildi.

- Ular o'rinbosarlar jamoasiga bugun borib qolgani yo'q. O'ziga yarasha sabablari borki, ularni U-21 jamoasiga berdik. Bu mashg'ulotdagi holat bilan bog'liq. Ularni kuzatyapmiz. Bilasizmi, asosiy jamoada o'ynash uchun shunga haqli bo'lish kerak. Bu birdaniga ro'y berib qolmaydi. O'rinbosarlardan ko'plab futbolchilarni chaqiryapmiz, ularni mashg'ulotda sinab ko'ryapmiz. Kimni loyiq ko'rsak, asosiy jamoada o'ynatamiz.

- Oleg Zoteev bilan Islom Mamatkazin qachon o'yinga tayyor bo'ladi?

- Mamatkazin endi-endi individual mashg'ulotlarni boshladi. Xayriyat, unda hech qanday muammo yo'q. Zoteev esa alohida topshiriqlarni tugatib, umumjamoa mashg'ulotiga qaytdi. Balki u 22 oktyabr kungi o'yinimizda zaxirada bo'lishi mumkin.

Maksim Shackix: "Men doim bir gapni aytaman: biz muxlislar uchun o'ynaymiz"