"Qizil iblislar" bosh murabbiyi Erik ten Hag Angliya termasi safida Qatardagi mundialda yaxshi o'yin ko'rsatgan mankunianlar sardori haqida gapirib o'tdi.

Niderlandiyalik mutaxassis shogirdini hozirgi darajasini saqlab qolishga chaqirdi. Himoyachi "uch sherlar" tarkibida asosiy o'yinchilardan biri bo'ldi. Maguayr ushbu xalqaro turnir tanaffusiga qadar samarasiz harakatlari sababli tanqidlar ostida qolib ketayotgan edi. Biroq u Jahon chempionatida mutlaqo o'zgarib, hatto jamoasining hujumlarida ham o'zini ko'rsatdi.

Joriy mavsumning birinchi qismida atigi 9 o'yinda ishtirok etib, shularning 5 tasida asosiy tarkibda maydonga tushgan futbolchi Qatarda mamlakati termasining barcha o'yinlarida haraktlandi.

2019 yilda 80 mln evro evaziga “Old Trafford” egalari safiga kelib qo'shilgan 29 yoshli futbolchi klub bilan 2,5 yillik bitimga ega. Ten Hagdan uni sotib yuborish borasida so'ralganda:

"Faqat u qolishni xohlamagan taqdirdagina. Aynan o'sha vaqtgacha men uning shu erda ekanidan mamnun bo'laman".

Shuningdek, mutaxassis quyidagi fikrlarni bildirdi:

"U Manchesterda yomon davrlarni o'tkazdi va albatta, keyin bir qator qiyinchiliklarga duch keldi. Angliya uchun deyarli har doim yaxshi o'yin ko'rsatgan.
Men undan ko'p narsa kutaman. Agar Harri undan talab qilinayotganlarni bajarsa, biz uchun ajoyib futbolchiga aylanadi.
Menimcha, Jahon chempionatini juda yaxshi o'tkazdi. Nihoyatda barqaror o'yin ko'rsatdi. Hozirgidek o'ziga ishonib o'ynashda davom etsa, xuddi barcha kutganidek, biz uchun juda muhim o'yinchi bo'ladi.
Ishonchim komilki, Maguayr bizning uslubimizda o'ynash va tizimimizga moslashish salohiyatiga ega".

"Maguayr JCHda nihoyatda barqaror o'yin ko'rsatdi" - Ten Hag