2006 yilgi "Oltin to'p" sohibi futbolchilik faoliyatini BAAda yakunladi va aynan shu erda dastlabki murabbiylik tajribasini orttirdi. O'sha paytda "Al Ahli" jamoasini Kosmin Olariu boshqarar, Kannavaro esa murabbiylar shtabi tarkibidan o'rin olgandi. Jamoa milliy chempionat va liga kubogini qo'lga kiritdi, bu esa uning uchun katta muvaffaqiyatga aylandi.

Mustaqil faoliyat boshlash vaqti kelgach, Kannavaro Xitoyga yo'l olib, "Guanchjou Evergrand" jamoasini boshqarishni o'z zimmasiga oldi. Biroq bu tajriba muvaffaqiyatsiz chiqdi va italiyalik mutaxassisning o'rnini tez orada Luis Felipe Skolari egalladi. Yuqori kutilmalar va kuchli bosim o'z tasirini ko'rsatgandi. Shundan so'ng, Kannavaro 2015 yil oktyabrida "Al Nassr" jamoasiga ishga joylashdi, ammo 2016 yil fevralida lavozimidan ozod etildi. Mutaxassis vaziyatni o'nglay olmadi va klubni turnir jadvalining yuqori qismiga qaytarishga muvaffaq bo'lmadi.

Bunday natijalardan so'ng uning murabbiylik faoliyati to'xtab qolishi mumkin edi, biroq Kannavaro o'z nomini saqlab qolgan edi. 2016 yil yozida u Xitoyning " Tyanczin" klubini qabul qildi va bu safar nihoyat muvaffaqiyatga erishdi. Elita ligasidagi birinchi mavsumida klub 3-o'rinni egalladi, Kannavaroning o'zi esa Xitoy chempionatining eng yaxshi murabbiyi deb tan olindi. Mutaxassis o'ziga ortiqcha bosim o'tkazmay, himoyaviy, ammo natijaga erishadigan jangovar jamoani shakllantira oldi.

Shundan so'ng Kannavaro yuqori lavozimga ko'tarilishi va "Guanchjou Evergrand"ga qaytishi mantiqiy edi. Bu safar hamma narsa ancha yaxshi kechdi. Kannavaro Superkubok va Xitoy chempionatida g'olib bo'lishga erishdi, o'zini juda moslashuvchan mutaxassis sifatida namoyon etdi. U vaziyatga qarab raqibga moslashish yoki o'z uslubini o'tkazishni uddalay olardi. Qizig'i, shu davrda u Xitoy terma jamoasini ham boshqardi, biroq atigi 6 haftadan so'ng, ikkala lavozimni birlashtirish imkonsizligini aytib, bu vazifani tark etdi.

Vatanga qaytish vaqti keldi. 2022 yil kuzida Kannavaro o'sha paytda B Seriyada ishtirok etayotgan "Benevento" boshqaruviga keldi. Uning oldiga jamoani elitaga qaytarish vazifasi qo'yildi, ammo buning o'rniga 2023 yil fevralida u ishdan bo'shatildi. Murabbiy jamoaga to'g'ri yondashuvni topa olmadi, o'yinni yo'lga qo'ya bilmadi, rahbariyat esa sabr-toqat ko'rsatmadi.

Kannavaro bir yildan ortiq vaqt davomida ishsiz yurdi. 2024 yil aprel oyida A Seriyadan tushib ketish xavfi ostida turgan "Udineze"ni qabul qildi. Vaziyat juda murakkab edi va umuman olganda, murabbiylarning deyarli hech biri bunday tavakkalchilikka bormasdi. Kannavaro esa "Benevento"dagi muvaffaqiyatsizlikdan so'ng yo'qotadigan hech narsasi yo'q edi.

Kutilmaganda Kannavaro hammani hayratga soldi. Qisqa vaqt ichida u jamoani yagona g'oya atrofida jipslashtirishga, himoyaviy o'yinni yo'lga qo'yishga va hujumda Lukkaga uzun paslar berish hamda standart vaziyatlarga urg'u berishga asoslangan sodda futbolni qo'llashga erishdi. Bu uslub o'z samarasini berdi. 6 o'yinda 2 g'alaba, 3 durang va 1 mag'lubiyat qayd etildi. "Udineze" elitadagi o'rnini saqlab qoldi, biroq shartnoma uzaytirilmadi. Rahbariyat va murabbiy kelisha olmadi, Kannavaro jamoani jiddiy kuchaytirish va o'z vakolatlarini kengaytirishni istadi, ammo bu talabi rad etildi.

Uning keyingi ish joyi "Dinamo Zagreb" bo'ldi, Kannavaro 2024 yil dekabrida bosh murabbiylikka tayinlandi. Kutilmalar juda yuqori edi, majburiy chempionlikdan tashqari, rahbariyat Evropadagi maqsadlar haqida gapirdi. Biroq natijalar juda zaif bo'lib chiqdi, u klub rahbarligida atigi 14 ta o'yin o'tkazdi va 2025 yil aprelida 3-o'rinda turgan holda lavozimini tark etdi. Qisqa muddatli natija talab qilingan "Udineze"dan farqli o'laroq, Zagrebda Kannavaro uzoq muddatli o'yin tizimini shakllantirishga duch keldi va buni uddalay olmadi.

Uning o'yin tamoyillari haqida bir narsa deyish qiyin, chunki u Xitoydagi davridan tashqari, uzoq muddat davomida o'zini ko'rsata olmadi. Kannavaro, shubhasiz, himoyani yaxshi tashkil eta oladi, lekin bu har doim ham hujumda samarali harakat qilish qobiliyati bilan uyg'unlashmaydi. Uning "Udineze"dagi o'yinini mavsumoldi tayyorgarligidan so'ng, ko'proq shaxsiy taktik usullarni qo'llagan holda ko'rish juda qiziq bo'lardi, ammo bu imkoniyat yuzaga kelmadi.

Xulosa qilish mumkinki, murabbiy undan hech narsa kutilmagan sharoitda samarali ishlaydi. U hali o'zini tizimli yoki natijasi kafolatlangan murabbiy sifatida obro' qozonishga loyiq inson ekanligini ko'rsata olmadi. Biroq qisqa muddatda uning xarizmasi, jahon chempionatidagi g'alabasi tufayli shakllangan obro'si va tajribasi malum bir natijaga erishishga yordam berishi mumkin.

Sergey Rumyancev

Kannavaro qanday murabbiy?