Аввалроқ испаниялик машҳур ютубер AuronPlay инглиз юлдузи ҳақида кескин фикрлар билдирган эди: "Испанияда Жуд Беллингем қадам босмаган бирорта тунги клуб қолмади. У алкоголни ҳаддан ташқари яхши кўради. Машғулотларда эса танасидан тер эмас, ром сизиб чиқади".
Беллингем 20 январь куни ЕЧЛ доирасидаги "Монако"га қарши баҳсда (6:1) гол уриб, уни қўлларида қадаҳ (рюмка) борлигини ифодаловчи ишора билан нишонлаган эди.
"Менимча, бу ҳақда аввал ҳам айтганман: шахсий ҳаёт ва футболни аралаштириб бўлмайди. Одамлар мени кўп кўнгилочар жойларга боришим ва кўп ичишим ҳақида ёлғон гапиришди, аммо бу ҳақиқатга тўғри келмайди. Мен ўта профессионал футболчиман.
Ўша голни нишонлаш усулига келсак, бу шунчаки ҳазил эди, холос", — деди Беллингем Чемпионлар Лигаси 1/4 финали доирасидаги "Бавария"га қарши ўйин олдидан ўтказилган матбуот анжуманида.
Эслатиб ўтамиз, "Реал" ва "Бавария" жамоалари ўртасидаги ҳал қилувчи жавоб учрашуви эртага Мюнхенда бўлиб ўтади. Биринчи ўйинда немис клуби 2:1 ҳисобида ғалаба қозонган. Беллингем ва унинг жамоадошлари Мюнхенда камбэк қилишга ҳаракат қилишади.
