Bugun hamkasblarimiz bilan O'zbekiston olimpiya terma jamoasi joylashgan mehmonxonaga tashrif buyurdik. Bu erda Jamshid Boltaboevdan intervyu oldik.

- Jiddiy jarohat tufayli bir yil o'ynay olmadingiz. Maydonga qaytishingiz og'ir o'yinga to'g'ri keldi. Maydonda qiyinchilikka duch kelmadingizmi?
- O'yinda juda qiyin bo'ldi deyolmayman. Chunki, Osiyo chempionatidan oldin bir nechta o'rtoqlik uchrashuvlarida o'ynadim. To'g'ri o'rtoqlik uchrashuvi rasmiy o'yindan katta farq qiladi. Janubiy Koreya bilan bazi vaziyatlarda tezlik bobida raqibga yutqazib qo'ydim, o'ylaymanki bu vaqtinchalik holat.

- Garchi “Paxtakor” tarkibida o'ng qanot himoyasida harakat qilgan bo'lsangiz ham sizning asosiy poziciyangiz boshqa. Janubiy Koreyaga qarshi o'ng qanot himoyasida harakat qilish noqulaylik tug'dirmadimi?
- O'ng qanot himoyasida noqulaylikni his qilmadim. Tan olaman ayrim vaziyatlarda meni qanotimdan xavfli hujumlar o'tib ketdi. Lekin, qanot himoyasida o'zimni erkin his qildim. Murabbiy o'yinga qarab qaysi joyga qo'ysa o'sha joyda bor kuchim bilan o'ynashga harakat qilaman.

- O'yin davomida qanot himoyasidan hujumchi ortiga o'tdingiz. Qaysi chiziqda o'ynash osonroq?
- Menimcha, o'ng qanot himoyasida harakat qilish osonroq. Chunki, markazda ko'proq yugurishga to'g'ri keladi. Shunga qaramay, menga markazda o'ynash ko'proq yoqadi.

- Hakam sizga qizil kartochka ko'rsatgan vaziyatda raqib oyog'ini butsaning tag qismi bilan bosib olgan ekansiz...
- O'sha vaziyatda raqibga jarohat etkazaman deb to'pga tashlanmagan edim. Raqib to'pga mendan oldin etib bordi, men esa oyog'imni olib qolishga ulgurmadim. O'yin payti maysani bosdim deb o'ylagan edim, uchrashuvdan keyin takroriy lavhalarda chindan ham koreys futbolchisining oyog'ini bosib olganimni ko'rdim. Shunga qaramay, hakam birinchi marta qoida buzganimni inobatga olib sariq kartochka ko'rsatsa ham bo'lardi menimcha, ilk qo'pollikdayoq keskin jazoladi.

Tolibjon Qosimov suhbatlashdi
Doha, Qatar

Jamshid Boltaboev: “O'ng qanot himoyadan ko'ra markazda o'ynash ko'proq yoqadi”