- Avvalo o'yin haqida fikringiz?

- O'ylaymanki, bugungi bahs muxlislarga yoqdi. Bazi vaziyatlarda sekin harakat qildik, buning aniq sababini hozir bilmayman. O'yinni tahlil qilib xatolar ustida ishlaymiz. O'yinimiz boshida qovushmadi, keyin esa sifatli futbol namoyish etishga o'tdik. Umuman olganda ikkinchi taymdagi o'yinimizdan qoniqdim. Ko'p vaziyatlarda to'pni nazorat qildik. Raqib juda kuchli edi va safarda durang qayd etdik. "Navbahor"da qanot yarim himoyachilari faol o'yin ko'rsatadi, lekin biz bunga tayyor edik va himoyachilarga alohida uqtirgandik. Namanganda o'ynash oson emas, biz taslim bo'lmadik va oxirigacha kurashdik. Ruhan cho'kib qolmaganimiz meni xursand qildi. Chempionat tugashiga hali 13ta tur bor. Ishlashda davom etamiz.

- "So'g'diyona" o'tgan tur "Nasaf"ga mag'lub bo'lgandi, bugun esa durang qayd etdi. Bu haqda nima deya olasiz?

- Birinchi davradagi o'yinimiz bilan taqqoslaganda ancha o'sganmiz deya olaman. O'tgan tur ham chiroyli harakat qilgandik. Asosiysi jamoamizda o'yin bor. Muammo - vaziyatlarni golga aylantirishda bo'lyapti. Buning ustida ishlaymiz. Tarkibimizda yaxshi futbolchilar bor, shunday ekan o'z maqsadimiz yo'lida kurashishda davom etamiz. Men jamoamdan yanada yaxshiroq natija kutaman. Futbolda ikki karra ikki har doim ham to'rt bo'lavermaydi, futbol shunisi bilan qiziq. Umumiy ochkolarimiz kam. Chunki ko'p o'yinlarda ochkolarni boy berib qo'ydik. Ammo aytganimdek, hali oldinda 13 tur bor va shu o'yinlarda ko'proq ochko ishlashga harakat qilamiz. Futbolni aldab bo'lmaydi, yakuniy jadvalda qaysi o'rinni olsak, shu haqqoniy bo'ladi.

- O'yinda ko'rdikki, jamoa asosan Lyupcho Dorievga tayanib qolgan. Ushbu futbolchisiz o'ynash qiyinmi?

- Aksar jamoalar yaxshi sifatli futbolchilarga tayanib o'ynaydi va bu normal holat. Bizda ham yaxshi futbolchilar ko'p. Maydonda Dorievdan tashqari yana 10 nafar futbolchi harakat qiladi va har birining o'z vazifasi bor. Lekin Lyupcho Doriev alohida mavzu. Balki u chempionatning eng yaxshi futbolchisidir. Bir maromda yuqori saviyada o'ynash oson emas. Doriev buni qo'ldan kelgancha uddalab kelyapti va buning uchun xursandman. Jamoamizda har bir futbolchining o'z vazifasi bor va hamma o'z ishini yaxshi bajarishga harakat qilyapti.

- Yangi qo'shilganlar jamoaga kirishib keta oldimi?

- O'tgan o'yindan keyin men bu savolga javob bergandim. Jamoadagi hamma bor kuch bilan yordam berishga harakat qilyapti. Yangi futbolchilarning kelganiga ko'p bo'lmadi, ammo ular mashg'ulotlarda yaxshi ishlamoqda. Jamoaga moslashish jarayoni davom etmoqda. Hali ko'rasiz, 3-4ta o'yindan keyin hamma yaxshi o'yin ko'rsata boshlaydi. Men doim talabchanman, hech qachon to'liq qoniqmayman.

Ivan Boshkovich: "Asosiysi jamoamizda o'yin bor"