Quyida tur ramziy terma jamoasini etiboringizga havola etamiz.

Darvozabon:
Akmal Xazratqulov ("Do'stlik-AIN")

Qarshiliklar darvozaboni ikkinchi turda ham hammadan kam to'p o'tkazib yubordi. Etakchilarga qarshi uchrashuvlarda Xazratqulov jamoaning eng ishonchli quroliga aylanadi. Akmal 2-turda gol ham urdi. "Paxtakor"ga qarshi o'yinning so'nggi daqiqasida yon chiziqdan oshirib berilgan to'pni to'xtatmasdan hamkasbi qo'riqlayotgan darvozaga yo'lladi.

O'yinchilar:
Davron Choriev ("Ardus")

CA talqiniga ko'ra, ikkinchi turning eng yaxshi futzalchisi deb topilgan Davron Choriev ramziyga birinchi bo'lib kiritildi. "Ardus"ni bir qator etakchilar tark etgach, aynan Davron klubning asosiy kuchiga aylandi. U turda eng ko'p gol urgan o'yinchiga aylandi. Beshta bahsda raqib darvozabonlarini 11 marotaba ranjitishga muvaffaq bo'ldi.

Islom Ahmedov ("Turon-S")

Andijonning "Turon-S" jamoasi birinchisidan farqli o'laroq ikkinchi turni yaxshi o'tkazdi. Uchta g'alaba bir qarashda juda ham kamtardek ko'ringan klub uchun ijobiy natija. Ushbu g'alabalarda jamoa sardori Islom Ahmedovning hissasi katta bo'ldi. U o'zining oltita goli bilan andijonliklarga to'rt pog'ona yuqorilashga katta yordam berdi.

Samandar Ochilov ("Kogon")

Ramziyning navbatdagi vakili "Kogon" azosi Samandar Ochilov. Buxoroliklarning turdagi sermahsul o'yiniga o'zining 9ta goli bilan katta hissa qo'shdi. Birinchi turda o'zini yaxshi ko'rsata olmagan futzalchi ikkinchi turda "ochildi".

Dilshod Irsaliev ("Olmaliq")

O'zbek futzalida ikkita o'yinchi hech qarimaydi. Birinchisi Bahodir Ahmedov bo'lsa, ikkinchisi Dilshod Irsaliev. Oliy liga 2-tur ramziy terma jamoasining so'nggi vakili "Olmaliq" safida to'p tepayotgan Dilshod Irsaliev. U turda 6ta to'p kiritdi. Lekin, bu ro'yxatga kirishining sababi gollarining sonida emas, ularni qanday urganligida. Irsaliev hozir ham birga-bir vaziyatlarda "Qirol".

Oliy liga. 2-tur ramziy terma jamoasi

Darvozabon: Akmal Xazratqulov ("Do'stlik-AIN")
O'yinchilar: Davron Choriev ("Ardus"), Islom Ahmedov ("Turon-S"), Samandar Ochilov ("Kogon"), Dilshod Irsaliev ("Olmaliq").
Zaxira: Mashrab Odilov ("Ardus"), Sohib Narzullaev ("Kogon"), Andrey Shlema ("Olmaliq"), Feruz Faxriddinov ("Do'stlik-AIN").

Tolibjon Qosimov

Hafta ramziy terma jamoasi