Championat.asia sayti talqiniga ko'ra, 24-turning eng yaxshi darvozaboni – Azizxon Isaqov ("Qo'qon-1912")

"Qo'qon-1912" bu turda o'yindan oldin favorit deya etirof etilgan OKMK bilan Olmaliqda ro'baro' kelib, 1:0 hisobida g'alaba qozondi. Ushbu muvaffaqiyatli bahsda qo'qonliklar posboni Azizxon Isaqovning o'rni beqiyos. 24 yoshli darvozabon uchrashuv davomidagi munosib harakatlari bilan esda qoldi, 1-2 vaziyatda jamoasi joniga ora kirdi. Championat.asia ijodiy guruhi o'zaro muhokamalardan so'ng Isaqovni eng yaxshi deb topdi.

Championat.asia sayti talqinida 24-turning eng yaxshi murabbiyi – Bahrom Haydarov ("Qo'qon-1912")

Qo'qonliklar ushbu turda Olmaliqqa safar uyushtirib, 1:0 hisobida g'alabaga erishdi. Ushbu g'alaba Bahrom Haydarovning o'yin uchun tanlagan taktikasi va rejasi orqali qo'lga kiritildi. Uning shogirdlari final hushtagi chalinguniga qadar himoyada mustahkam tura oldi. Haydarov bahs mobaynida futbolchilariga sergaklikni yo'qotmaslikni uqtirib turdi va faol harakat qilishga undadi. Shunday qilib, 47 yoshli mutaxassis haqli tarzda tur murabbiyi deya etirof etildi.

Championat.asia sayti talqiniga ko'ra, 24-turning eng yaxshi futbolchisi – Igor Sergeev ("Paxtakor")

"Paxtakor" ushbu turda mehmonda "Buxoro"ni yirik hisobda engdi (4:0). Shubhasiz, bu bahs O'zbekiston MTJ forvardining benifisiga aylanib ketdi. U dubl qayd etib, 1 ta golga assistentlik ham qildi. 32 yoshli Sergeev natijani bir o'zi hal qildi desak xato bo'lmaydi. Bundan tashqari, Superligadagi gollari sonini 16 taga etkazib, yaqqol to'purar bo'lib olganini etirof etish joiz. Shu tariqa, hech bir ikkilanishlarsiz "qotil" hujumchi Igor Sergeev 24-turning eng yaxshi futbolchisi nomiga munosib ko'rildi.

Championat.asia sayti talqinida 24-turning eng chiroyli goli muallifi – Amir To'raqulov ("Bunyodkor")

"Bunyodkor" bu turda "Nasaf" bilan bahs yuritib, jangovar durang qayd etdi (2:2). Mazkur o'yinning 41-daqiqasida To'raulov olis masofadan chap oyoqda darvozani nishonga oldi, zarba o'ta muvaffaqiyatli bo'ldi va to'p darvoza to'ridan o'rin oldi. Shu tariqa, o'tgan turda bo'lgani kabi yosh xavbek urgan gol yana eng chiroylisi sifatida tan olindi.

24 yoshli darvozabon, kuchli jamoani yutgan vodiy jamoasi ustozi, MTJ hujumchisi - Superligada 24-turning eng yaxshilari