Ulardan biri Farruh Ibrohimov 2024 yilda jamoa safida 27 ta o'yinda maydonga tushdi, O'zbekiston kubogida 5 ta uchrashuvda 1 ta gol urdi. Futbolchi mavsum yakunlari bo'yicha fikrlari bilan o'rtoqlashdi.

- Bu yilgi mavsum siz uchun qanday o'tdi? Nimasi bilan yodda qoldi?

- Qaysidir manoda o'zim istagan natijaga erisha olmadim. Muxlislar "Xorazm" jamoasi qayd etayotgan natijalarga qaramay oxirigacha qo'llab-quvvatlab turishdi.

- "Xorazm" jamoasida mavsum o'rtasida murabbiy o'zgardi. Hakim Fuzaylov qo'l ostida oldin o'ynagansiz. Murabbiy o'zgarishi natijada ko'rinmadi. Nima etishmadi?

- Hakim Fuzaylov bosh murabbiy bo'lganidan so'ng o'yin sifati ijobiy tomonga o'zgardi. Muxlislarbop chiroyli o'yin ko'rsatishga harakat qildik. Afsuski, bu natija uchun kamlik qildi. Keraksiz joyda yo'qotilgan ochkolar pand berdi. Ayrim vaziyatlarda sovuqqonlik etishmadi.

- Pro liganing bu yilgi formati qanday taassurot qoldirdi?

- Jamoalar 4 tadan bir-biri bilan o'zaro o'yinlarda ishtirok etdi. Har bir o'yin qiziqarli kechdi. Yaxshi saviyadagi uchrashuvlar ko'proq bo'ldi.

- "Xorazm" yangi mavsumda Superliga uchun kurasha oladimi?

- Keyingi mavsumda jamoada etarlicha imkoniyat bo'ladi deb o'ylayman. "Xorazm" muxlislarni xursand qilishga harakat qiladi.

- Yangi yilga rejalaringiz qanday?

- Superligaga qaytishga yoki o'zimni boshqa xorij chempionatlarida sinab ko'rishga tayyorman. Barchasini vaqt ko'rsatadi.

Farruh Ibrohimov: "Xorazm"da yangi yilda yaxshi imkoniyat bo'ladi, o'zim esa Superligaga qaytishga tayyorman"