Birinchi bahsda nursiz durang qayd etilgan uchrashuvlarning ikkinchi qismi birinchisidan farqli ravishda nihoyatda qizg'in o'tishiga shubha yo'q. Kataloniyada ham, Myunxenda bizni "qaynoq" javob bellashuvlari kutmoqda.

Evropa chempionlar ligasi Germaniya va Ispaniyaning oxirgi vakillari "Bavariya" hamda "Barselona"ni faqatgina g'alaba qanoatlantiradi. Chunki birinchi bahsda safarda 0:0 hisobida durang qayd etilgani javob bahsida mehmonlarga mag'lubiyatdan boshqa istalgan natija etarli bo'ladi.

Murabbiylar nima dedi?

Niko Kovach ("Bavariya" bosh murabbiyi): "Bu o'yinni butun dunyo tomosha qiladi. Mazkur bahs nafaqat futbolchi yoki murabbiylar uchun, balki muxlislar va matbuotning ham diqqat markazidagi muhim to'qnashuv. Ajoyib voqelik. Biz keyingi raundga chiqishni istasak g'alabadan boshqa yo'limiz yo'q. O'ylashimcha, nursiz durang bo'lmaydi. Bizni uzoq kutilgan va ajoyib muhitdagi 12-futbolchilarimizning ko'magi kutmoqda".

Yurgen Klopp ("Liverpul" bosh murabbiyi): "Bu o'yinning boshqa bir jihat bilan hech qanday aloqasi yo'q. Barqaror va aniq bir ritmda futbol o'ynashimiz talab etiladi. "Bavariya" yuksak darajadagi jamoa. Mudofaa chizig'ida juda mustahkam o'ynash lozim. Sovuqqonlik va ishonch bilan o'ynash asosiy qurolimizga aylanishi mumkin. Biz hech qanday bosimni his qilayotganimiz yo'q. Myunxenda shunchaki ajoyib futbol muhiti hukmronlik qilmoqda. Bilamiz, bizga natija lozim. Lekin bu narsa bizni havotirlantirayotgani yo'q. Bosim yo'q. Xotirjamlik muhim. Azaldan menga bu erga kelish yoqadi. Chunki juda ko'p yoqimli xotiralarim aynan mazkur stadion bilan bog'liq. Ko'plab gollar quvonchi va g'alaba onlarini boshdan kechirganman. Shu boisdan ham menga "Alyanc Arena"da o'ynash yoqadi".

Ernesto Valverde ("Barselona" bosh murabbiyi): "Ichki chempionat bilan ECHL o'yiniga tayyorlanishning farqi bor. Chunki musobaqa juda jiddiy va bunga o'zgacha yondoshuv zarur. Musobaqani ko'plab grand jamoalar tark etgani ogohlik ko'ng'irog'idan darak. Bu esa istalgan natija ruy berishi mumkinligini bildiradi. "Lion"ning kuchli va kuchsiz taraflarini bilamiz. Ularni chuqur o'rgandik va tahlil qildik. Jamoada yaxshi futbolchilar jamlangan. Biz mazkur to'qnashuvga tayyormiz. O'z ishimizni qilishimiz talab etiladi. Muxlislardan doimgidek ajoyib muhit va "qaynoq" qo'llab-quvvatlovni kutamiz. Ular bizni hech qachon yolg'izlatib qo'yishmaydi".

Bryuno Jenezo ("Lion" bosh murabbiyi): "O'zimizning doimgi futbolimizni namoyish etishimiz lozim. Bilamiz, bizning qarshimizda jahonning eng kuchli jamoalaridan biri turibdi. Oson bo'lmasligi aniq. Guruh bosqichida kuchli raqibni mag'lub eta olishimizni isbotladik. Bugun mazkur musobaqada ishtirokimizni davom ettirishga loyiqligimizni ko'rsatishimiz kerak bo'ladi. "Ayaks"ning "Real"ga qarshi o'yini va ularni musobaqadan chiqarib yuborgani bizga qo'shimcha kuch beradi. Bugun ko'p narsa Messiga bog'liq. Biz uni zararsizlantirish rejasini tuzib chiqdik. O'yinda shuni amalda tadbiq etamiz. Uchrashuv davomida bardoshlik bo'lish va kerak paytda tavakkalga qo'l urshimiz lozim".

ECHL, nimchorak final. Javob o'yinlari.
"Bavariya" - "Liverpul" (0:0)
"Alyanc Arena".
Bosh hakam: Daniel Orsato (Italiya)
"Bavariya": Noyer; Rafinya, Zyule, Xummels, Alaba; Martines, Tyago, Gnabri, Xames, Riberi; Levandovski
O'ynamaydi: Kimmix (diskvalifikaciya), Myuller (diskvalifikaciya), Robben (jarohat), Tolisso (jarohat)
So'roq ostida: Koman (jarohat)
"Liverpul": Alisson; Aleksander-Arnold, Matip, van Deyk, Robertson; Veynaldum, Fabino, Xenderson; Salax, Firmino, Mane
O'ynamaydi: Keyta (elon qilinmadi), Oksleyd-Chemberlen (jarohat), Gomes (jarohat)
So'roq ostida: Aleksander-Arnold (jarohat), Milner (jarohat), Lovren (jarohat)
Diskvalifikaciya xavfidagi futbolchi: Robertson

"Barselona" - "Lion" (0:0)
"Kamp Nou".
Bosh hakam: Simon Marshinyak (Polsha)
"Barselona": ter Stegen; Semedu, Pike, Langle, Alba; Rakitich, Buskets, Serxi Roberto; Messi, Suares
O'ynamaydi: Rafinya (jarohat), Vermalen (jarohat)
So'roq ostida: Dembele (jarohat)
Diskvalifikaciya xavfidagi futbolchi: Semedu
"Lion": Lopesh; Denayer, Marselo, Marsal; Dyubua, Tusar, Ndombele, Mendi, Fekir; Dembele, Depay
O'ynamaydi: Guyri (jarohat)
So'roq ostida: Marselo (jarohat)

Evropa chempionlar ligasi La Liga va Bundesliga vakillaridan "ayriladimi"? (Prevyu)