Davralar oralig'ida ko'plab futbolchilar jamoani tark etishdi. Xo'sh, "Zomin" mavsumni nechanchi o'rinda tugatish uchun kurashoqda. Moliyaviy vaziyat qanday holatda? Bu borada jamoa sardori Eldor Karimov bilan suhbatlashdik.

“Aral Samali” bilan o'yin xususida

- Nukusda juda qiyin o'yin bo'ldi. Chunki raqibimiz ham Pro ligada jon saqlab qolish uchun kurashmoqda. 3 ochko ikki jamoaga ham suv va havodek zarur edi. Jangovar bellashuv bo'ldi, lekin omad bizdan yuz o'girdi. Afsuski, mag'lubiyatga uchragan holda uyga qaytdik.

Bir nafar darvozabon bilan borilgani haqida

- Darhaqiqat, o'yinga 1 nafar darvozabon bilan bordik. Ikkinchi darvozabonimiz biroz betobligi sababli, shunday holat yuzaga keldi. Uning o'rnida futbolchi xizmatidan foydalandik.

Pro ligada qolish imkoniyati borasida

- Bizda imkoniyat bor. Xudo xohlasa, bu vazifani uddasidan chiqa olamiz. Oldinda ko'plab o'yinlarimiz bor, ijobiy natija ko'rsatishga urinamiz.

Yangi kelgan futbolchilar to'g'risida

- Ha, albatta, yangi kelganlar tarkibga moslashib boryapti. O'yindan-o'yinga jamoani kuchaytirib boryapti. Ishonchim komilki, ular jamoaga yordam bera oladi.

Moliyaviy holat xususida

- Haligacha jamoamizda moliyaviy holat ijobiy tomonga o'zgargani yo'q. Ishonamanki, jamoa yil yakuniga qadar barcha qarzlarni uzadi. Klubda katta o'zgarishlar bo'lishiga men va jamoadagi barcha futbolchilar ishonadi. Klubda pullarimiz qolib ketmaydi.

Maoshsiz futbol o'ynashi borasida

- To'g'risi, maoshsiz futbol o'ynashga futbolchilar o'rganib qoldi. Yaqin kunlarda jamoaga yaxshi homiy chiqib qoladi degan umiddamiz. Biz maydonga chiqib, jamoani saqlab qolish uchun harakat qilyapmiz. Mehnatlarimiz zoe ketmasligiga va homiylar chiqishiga ishonaman.

Eldor Karimov: “Maoshsiz futbol o'ynashga o'rganib qoldik”