Bu turda bir qator qiziqarli uchrashuvlar kutmoqda. Mazkur o'yinlar oldidan "Andijon", "Yangier", "Mashal" jamoalarida faoliyat olib borgan Diyor Mirzaboevning fikrlari bilan qiziqdik. Mutaxassis jamoalarning imkoniyatlarini baholadi.

"Nasaf" – "Qo'qon-1912"

Oxirgi turda "Qo'qon-1912" jamoasi medallar uchun kurashayotgan "OKMK" jamoasini safarda mag'lub qildi. "Qo'qon-1912" jamoasi Qarshiga yaxshi kayfiyat va qo'shimcha motivaciya bilan borishi aniq. "Nasaf" jamoasi o'tgan turda "Bunyodkor" jamoasi bilan murosa yo'lini tanladi va O'zbekiston chempionatida chempionlik uchun intrigani kuchaytirdi. Lekin ketma-ket ikkinchi yil chempionlik uchun asosiy favorit hisoblangan jamoa bunday hal qiluvchi o'yinlarni o'z uyida ijobiy hal qiladi, deyish mumkin.

Imkoniyatlar: 70 – 30

"So'g'diyona" – "Surxon"

Jizzaxliklar chempionatning yakunlovchi qismini ancha faol o'tkazmoqda. Mehmonda autsayder "Sho'rtan" jamoasini mag'lub etishdi. Hujum chizig'ida yuqori malakali ijrochilarga ega. "Surxon" jamoasi yosh va ishtiyoq baland, tezkor hujumlar uyushtiruvchi va kurashchang jamoa. Ushbu bahsda tajriba va mahorat o'z so'zini aytadi.

Imkoniyatlar: Jizzax jamoasi g'alaba qozonsa kerak.

"Andijon" – "Sho'rtan"

"Andijon" jamoasi o'tgan turda vodiy derbisida safarda mag'lubiyatga uchradi. Osiyo chempionlar ligasida va milliy chempionat uchrashuvlarida o'yin o'tkazayotgan jamoa uchun ikki frontda harakat qilish albatta oson emas. Bu yoqda Superligadan chiqib ketmaslik uchun ham kurash ketayotgani aniq. Shuningdek, agar "Sho'rtan" jamoasi safarda "Andijon"ga mag'lub bo'lsa, Superligani tark etishi aniq bo'ladi. Yangi bosh murabbiy qo'l ostida "Sho'rtan" jamoasi 3 ochko uchun harakat qiladi.

Imkoniyatlar: 50 – 50

"Mashal" – "Xorazm"

Oxirgi turda "Mashal" jamoasi Navoiyda alamli mag'lubiyatga uchradi. Otabek Narzullaev bosh murabbiy etib tayinlangandan so'ng jamoada o'yin uslubi o'zgardi - kombinacion va hujumkor futbol namoyish etmoqda. Lekin gol urish borasida qiynalmoqda. "Xorazm" jamoasida tajribali futbolchilar yig'ilgan. Superliga jadvaliga etibor qaratsak, har ikki jamoa ham o'tish o'yinlariga tushib qolmaslik uchun kurashmoqda.

Imkoniyatlar: 60 – 40

"Navbahor" – "Bunyodkor"

"Navbahor" jamoasida bosh murabbiy o'zgardi. Jamoa uyda "Qizilqum"ni mag'lub etdi va safarda "Xorazm" bilan durang o'ynadi. Nazariy jihatdan jamoa hali ham sovrindorlar orasidan joy olishi mumkin. Namanganda har qanday jamoaga ham 3 ochko olib ketish oson emas. Yangi shakllanayotgan "Bunyodkor" jamoasi Toshkentda amaldagi chempion bilan durang o'ynadi. Medallar uchun kurashayotgan jamoalardan biri hisoblanadi.

Ikkala jamoa o'rtasida ehtiyotkor o'yin kutilmoqda.

Imkoniyatlar: durang.

"Dinamo" – "Buxoro"

Samarqandliklar medallar uchun asosiy nomzodlardan hisoblanadi. Qo'lga kiritilayotgan g'alabalar buning yaqqol isboti. "Buxoro" jamoasi uchun esa bu oson o'yin bo'lmaydi, chunki ular ham O'zbekiston kubogi finali va Superligada qolish masalasi bilan band. "Buxoro" jamoasi ruhiyatini jamlab olishi kerak bo'ladi.

Imkoniyatlar: 50 – 50

"Paxtakor" – "Qizilqum"

Ikkala jamoa ham oxirgi turda g'alabaga erishdi. "Paxtakor" jamoasida milliy terma jamoa azolari mavjud. Yuqori malakali ijrochilar yig'ilgan jamoa hisoblanadi. "Qizilqum" jamoasi o'yin davomida himoyaviy futbol ko'rsatadi.

Imkoniyatlar: "Paxtakor" ishonchli g'alaba qozonadi.

"Neftchi" – OKMK

"Neftchi" chempionlik uchun asosiy nomzod jamoa. Hal qiluvchi pallada o'z maydonida tajribali OKMK jamoasini qabul qiladi. Tomoshabinlar bilan to'lgan o'yingohda muxlislarni xursand qilishga harakat qiladi. "Neftchi" jamoasi "Nasaf" kabi barqaror natija ko'rsatayotgan, hozirgi kunda yuqori sport formasidagi jamoa desak bo'ladi.

OKMK jamoasi oxirgi ikki turda mag'lubiyatga uchradi, lekin bu natijalar ushbu o'yinda hal qiluvchi ahamiyat kasb etmaydi.

Imkoniyatlar: 60 – 40

Ekspert fikri. Superliga 25-tur boshlanmoqda. "Nasaf" chempionlik uchun yana bir qadam tashlaydimi?