Diyor Imomxo'jaev, futbol sharhlovchisi: “O'zbekiston milliy terma jamoasi sekin-asta o'z o'yinini topib olmoqda. Bunda murabbiy Samvel Babayanning xizmatini hech kim inkor qila olmaydi. Milliy terma jamoamiz KXDR va Yamanga qarshi bo'lib o'tadigan o'yinlar oldidan yaqqol favorit.

Koreyaliklarning safar uchrashuvlari shuni ko'rsatib berdiki, ular mehmonda o'z uylarida harakat qilganlaridek o'ynay olishmaydi. Qo'shimchasiga futbolchilarni guruhdagi asosiy raqibga qarshi ruhlantirish uchun Samvel Babayanda yaxshi imkoniyat bor. Bu borada birinchi uchrashuvni eslashning o'zi kifoya. Yaman terma jamoasi esa qaysi stadionda bo'lmasin, bugungi O'zbekiston milliy terma jamoasi uchun qiyin raqib hisoblanmaydi. Bosh murabbiy olib borayotgan siyosat ko'p hollarda tanqid ostiga olinmoqda. Lekin bunda tanganing ikkinchi tomonini ham nazardan chetda qoldirmaslik lozim. Milliy terma jamoada faoliyat olib borgan mutaxassislar orasida faqatgina Samvel Babayan dastlabki uch bellashuvda g'alaba nashidasini surgani bilan ajralib turadi. Qolgan birorta murabbiyga bunday muvaffaqiyat nasib qilmagan. Shunday ekan, uning siyosatini keskin tanqid qilishdan tiyilish kerak.

O'zbekiston milliy terma jamoasining barcha mashg'ulotlari yopiq holda o'tkazilsin va o'yinlarga faqatgina “Paxtakor” markaziy stadioni mezbonlik qilsin, lekin buning barobarida milliy terma jamoa jahon chempionati chiptasini qo'lga kiritsin degan shart qo'yilsa, menimcha, jurnalistlar ham, futbol muxlislari ham rozi bo'lishadi. Hozir asosiysi rasmiy o'yinlarda qayd etajak natijamiz bo'lib turibdi. Shuni unutmaslik kerakki, Samvel Babayan “Paxtakor”da faoliyat olib borganida ham OAV vakillari uchun shaffof bo'lmagan. Bu uning harakteridan kelib chiqadi. Madomiki, murabbiy natijaga erishayotgan ekan, demak uning siyosatiga ko'nikish kerak. Boz ustiga, mashg'ulotlarning hammasi ham yopiq emas, kerak paytda OAV hodimlari uchun sharoit yaratib berilmoqda. Samvel Babayanning “Paxtakor” bilan munosabati esa tamomila boshqa masala. Bu men uchun kutilmagan holat emas. Juda istaganida ham mutaxassis o'zi bir necha yildan buyon boshqarib kelayotgan
“Paxtakor”dan uzilib qola olmasdi, bu tabiiy hol. Shaxsan men uning “Paxtakor”dan suniy ravishda chetlashtirib qo'yilishini esa g'alati qaror sifatida baholagan bo'lardim. Masalan, Rossiya milliy terma jamoasi bosh murabbiy Leonid Sluckiy bir vaqtning o'zida CSKAda ham faoliyat olib bormoqda. Men aytib o'tgan qarorning g'alatiligi sabab Samvel Babayan kattagina bosim ostida qoldi. Terma jamoaga futbolchi jalb qilishidan tortib, uning “Paxtakor” ishtirokidagi o'yinlarga borayotgani, kerak paytda futbolchilarning echinish xonasiga kirayotgani ham tanqid qilib o'tilmoqda. Vaholanki, u har ikki fronta ham faoliyat olib borishiga ruxsat berish mumkin edi. Xo'ja ko'rsin uchun chiqarilgan qarorlar hech vaqt o'zini oqlagan emas. O'sha qaror tasirida Babayan “Paxtakor”dan baribir voz kechib keta olmasdi. Hozir vaziyatni to'g'ri baholash eng yaxshi mezon.

Babayan “Paxtakor”ning barcha futbolchisini oladimi, jamoaga befarq bo'lmaydimi, bu ikkinchi masalaga aylanishi kerak. Muhimi, uning bosh jamoada qayd etayotgan natijasi. Ayni paytda milliy terma jamoamizning ishlari joyida. Umid qilamanki, bu muvaffaqiyatlar keyingi ikki o'yinda ham davom ettiriladi. Bunga kuchimiz ham, imkoniyatlarimiz ham etarli. Gap milliy terma jamoa xususida borar ekan, uning yo'lida bo'linishimiz emas, birlashishimiz juda muhim.

Kamoliddin Alimov yozib oldi

Diyor Imomxo'jaev: "O'zbekiston KXDR va Yamanga qarshi o'yinlar oldidan yaqqol favorit"