Unda aytilishicha, "qaldirg'ochlar" tomonidan jami 393 nafar xodimlarga nisbatan oktyabr oyi uchun 1 mlrd 532 million 216 ming so'm miqdoridagi oylik maoshlari to'lab berilishi kechiktirilgan. Bu haqda jamoaning bosh direktori Ulug'bek Mirzaevning munosabati bilan qiziqdik.

"Bunyodkor"da moliyaviy muammolar yuzaga kelayotgani to'g'risida qator yangiliklar elon qilinyapti. Ularning nimaga asoslanayotganiga hayron qolyapmiz. Chunki vahima qilishga arzigulik holat emas. To'g'ri, xodimlarga oktyabr oyi uchun ish haqini to'lab berishimiz kerak. Lekin bu borada bosh homiy - "O'zbekneftgaz" AJ bilan birgalikda barcha say-harakatlar amalga oshirildi. Ayni paytda hujjatlarni rasmiylashtirish jarayoni ketyapti. Tez orada barchaga oktyabr oyi uchun ish haqi tarqatiladi.
Biz uchun futbol mavsumi yakunlanganidan xabaringiz bor. Oxirgi o'yinlar uchun mukofot pullari ham imkon qadar tez beriladi. Aytishim mumkinki, vahima qiladigan hech narsa yo'q. Klubda barchasi joyida. O'zbekistondagi barcha jamoalar shunday kunlarni boshdan o'tkazishini bilamiz. Bizdan ham qiyinroq vaziyatda bo'lganlar bor. Biroq, faqat "Bunyodkor" jamoasi haqida bunday malumotlar tarqatilayotgani hayron qoldiryapti. Bu kimgadir kerakmi? Bilmadim. Barcha muxlislarga dadil aytishim mumkinki, bizda hech qanday muammolar yo'q. Yilni moliyaviy tomondan juda yaxshi tugatyapmiz. Shu tufayli "O'zbekneftgaz" AJga, uning raisi va klubimiz prezidenti Mehriddin Abdullaevga alohida minnatdorchilik bildiramiz.
Barchasi yaxshi, jamoamiz kelasi mavsumga ham puxta tayyorgarlik ko'radi. Bu boradagi xavotirlar aslo o'rinsiz", - deydi "qaldirg'ochlar" bosh direktori U. Mirzaev.

"Bunyodkor" bosh direktori: "Xavotir olish o'rinsiz, vahimaga asos yo'q"