Jamoaning hozirgi kundagi faoliyati bilan bog'liq savollarga javob olish maqsadida bosh direktor Baxtiyor Boboevga murojaat qildik.

- Klub tuzilmasida amalga oshirilgan o'zgarishlar nima bilan bog'liq?
- Klubimiz tuzilmasi o'zgarishining sabablari bir nechta. “Bunyodkor” futbol klubi - akciyadorlik jamiyati. Biz O'zbekiston Respublikasi Prezidentining “Akciyadorlik jamiyatlarida zamonaviy boshqaruv uslublarini joriy etish chora-tadbirlari to'g'risidagi” farmonidan kelib chiqib, o'zgarishlarga qo'l urdik. Rahbariyat, homiylar, futbol muxlislari jamoamizning qatorasiga ikkinchi yil sovrinsiz qolayotganidan qoniqmasligi tabiiy. Akcionerlarning umumiy yig'ilishida xalqaro tajriba asosida, klubning sohaga oid xususiyatlarini inobatga olib, yangi tashkiliy tuzilma tasdiqlandi. Klub Nizomiga tegishli o'zgartirishlar kiritildi. Shuningdek, klub faoliyati xalqaro standartlar hamda jahon futbolining etakchi jamoalari tajribalariga asoslangan holda yuritiladi. Tuzilma samarali ishlash uchun zamin yaratishi kerak.

- Strukturadagi o'zgarishlar haqida gap ketganda asosan nimalarga etibor qaratish lozim?
- Yangi tashkiliy tuzilmaga ko'ra, ijroiya organi rahbari bosh direktor hisoblanadi. Ushbu lavozimga saylovlar o'tkazish tartibi ham ko'rib chiqildi. Bosh direktor tayinlash borasidagi saylovning yangi tartibi ishlab chiqildi. Ijroiya organi rahbarini tayinlash, qoidaga ko'ra, tanlov asosida amalga oshiriladi. Unda xorijlik menejerlar ham ishtirok etishi mumkin. Yangi tashkiliy tuzilmaga ko'ra, ijroiya organi azoligiga sport ishlari direktori va boshqalar ham kiradi. Murabbiylar kengashi tuzildi. Shuningdek, boshqa o'zgarishlar ham bor.

- Murabbiylar kengashining vazifasi nimalardan iborat? Uni kim boshqaradi?
- Murabbiylar kengashiga klub Bosh direktori bevosita rahbarlik qiladi. Kengash klubimizning bolalardan to asosiy tarkibgacha bo'lgan barcha jamoalar uchun masul bo'ladi. Murabbiylar kengashi yoshlar tarkibi, “Bunyodkor”ning birinchi va ikkinchi ligadagi jamoalari murabbiylari lavozimlariga nomzodlarni ko'rib chiqadi, ularning ish rejalarini tasdiqlaydi. Shuningdek, rejalar bajarilishini muntazam ravishda nazorat qilib boradi. Yangi nomzodlarni tavsiya qilish bilan klubning Selekciya xizmati shug'ullanadi. Biroq futbolchilar yoki mutaxassislar bilan imzolanadigan shartnomalar borasida yakuniy qaror Murabbiylar kengashida qabul qilinadi.

- “Klubning bolalardan to asosiy tarkibgacha bo'lgan barcha jamoalari uchun masul”lik nimalarda ifodlanadi?
- “Bunyodkor” FKning 2015-2020 yillar uchun ishlab chiqqan istiqbolli rivojlanish dasturi bor. Biz xuddi bir piramidaga o'xshash tizimni shakllantirmoqchimiz. Shogirdlarimiz o'z ustida ishlab, kamol topib borib malum bir yosh toifasidan ikkinchisiga o'tishi, keyinchalik asosiy jamoada o'ynab ketishi, qolaversa O'zbekistonning turli yoshdagi terma jamoalariga nomzod bo'lib etishishiga erishib, samarali faoliyat yuritishni istaymiz. Hozirgi paytda bir qator tarbiyalanuvchilarimiz mamlakatimizning turli yoshdagi o'smirlar va yoshlar terma jamoalariga asosiy nomzodlar hisoblanishadi. Bu tizim xuddi sozlangan mexanizm kabi ish yuritishini xohlaymiz. Bolalar 14 yoshgacha maktabimizdagi murabbiylardan futbol sir-asrorlarini o'rganishadi. Keyinchalik, 17 yoshgacha eng iqtidorli deb topilganlar ikkinchi va birinchi ligadagi jamoalarimiz safida to'p tepib, malakalarini oshirib borishadi. Keyingi bosqich - yoshlar jamoasi tarkibida jiddiy musobaqada tajriba orttirish. Va nihoyat, har tomonlama eng yaxshi sifatlarini ko'rsata olganlar “Bunyodkor”ning asosiy tarkibiga qabul qilinadi. Sanab o'tilgan bosqichlarni klubimiz sport direktori Sergey Lushchan nazorat qilib boradi. Klubning 2015-2020 yillar uchun ishlab chiqqan istiqbolli dasturiga ko'ra, 2017 yilgi mavsumda “Bunyodkor” asosiy tarkibidagi mahalliy futbolchilarning 75 foizi akademiyamiz tarbiyalanuvchilaridan iborat bo'lishi kerak. 2020 yilga kelib esa ushbu ko'rsatkich 80 foizga etkazilishi lozim.

- Demak, bundan “Bunyodkor” O'zbekistonning boshqa jamoalaridan futbolchi olmaydi degan xulosaga kelish mumkinmi?
- Futbol maktabimizni o'z zaxiramizga ega bo'lish uchun tashkil etganmiz. Lekin, dunyoda hech bir klub faqatgina o'z tarbiyalanuvchilari hisobigagina jamoa tuzmasligi ham yaxshi bilamiz. Selekciya muntazam amalga oshiriladi. Shuning uchun ham jamoamiz o'yinini kuchaytirishi mumkin bo'lgan nomzodlarni kuzatib boradigan selekciya xizmatiga qo'yiladigan talablar ham ortmoqda. Salohiyati yuqori bo'lgan yangi nomzodlarni kuzatib borish qisqa vaqtda emas, balki uzoq muddatli bo'lishi kerak. Jamoamizga qabul qilinadigan yangi nomzodlarni jismoniy, texnik, taktik, ruhiy va insoniy sifatlariga qaraymiz. Eng asosiysi, yangi nomzod jamoamiz o'yiniga tez moslashib ketishi kerak. Shuningdek, taklif qilinayotgan futbolchi bizdagi yigitlardan bir bosh ustun bo'lishi lozim. Aks holda futbol maktabimiz tarbiyalanuvchilariga imkon berganimiz maqul.

- Asosiy jamoaning mashg'ulotlariga kim boshchilik qiladi?
- Mashg'ulotlarni Sergey Lushchan bilan birgalikda olib boramiz. Klub oldidagi maqsad va vazifalarni amalga oshirish borasidagi umumiy masuliyat mening zimmamda bo'ladi.

- Yuriy Sarkisyanning xizmatlariga boshqa jamoalar, jumladan “Andijon” klubi ehtiyoj sezayotgani haqida turli mish-mishlar yuribdi. Yuriy Vazgenovichning keyingi taqdiriga oydinlik kiritib o'tsangiz. Bu mutaxassis “Bunyodkor”da qoladimi?
- Ha, Yuriy Vazgenovich bundan keyin ham jamoamizda faoliyatini davom ettiradi. U bevosita asosiy tarkibning tashkiliy ishlarida ishtirok etadi. Biz tajribali mutaxassisning mehnatlarini qadrlaymiz.

- “Bunyodkor” yangi mavsumdagi ilk rasmiy uchrashuvini 9 fevral sanasida Osiyo Chempionlar ligasi guruh bosqichiga yo'llanma olish uchun BAAning “Al-Shabab” jamoasiga qarshi o'tkazadi. Umuman, yangi mavsumga olib boriladigan tayyorgarlik jarayoni qanday kechadi?
- 14 dekabr kuni jamoa tatildan qaytdi. Barcha futbolchilar shifokorlar nazoratidan o'tishmoqda. Yangi yilgacha va yanvar oyining birinchi yarmida o'z qarorgohimizda shug'ullanamiz. Baxtimizga, “Bunyodkor” sport majmuasida mashg'ulotlar o'tkazish uchun barcha shart-sharoit yaratilgan. So'ngra xorijda tashkil etiladigan yig'inga yo'l olamiz. U erda bir nechta nazorat uchrashuvlari o'tkaziladi. Shundan so'ng, yana Toshkentga qaytib kelamiz va rasmiy o'yinga tayyorgarlikni o'z uyimizda yakunlaymiz.

Mirzahakim To'xtamirzaev suhbatlashdi

Baxtiyor Boboev: "Tuzilma samarali ishlash uchun zamin yaratishi kerak"