"Yig'inimiz davom etmoqda. "Nasaf"ga qarshi nazorat uchrashuvida ko'pgina kamchiliklarimizni ko'rib va bilib oldik. Ikkinchi davraning boshida "Andijon" va "Neftchi" kabi kuchli jamoalarga qarshi o'yinlar bilan boshlaymiz" - dedi Bahrom Haydarov.

- Superliganing birinchi davrasi uchun "Qo'qon-1912"ga necha baho qo'ygan bo'lar edingiz?

- Egallab turgan o'rnimizga qarasak, jamoa o'yinini yaxshi baholab bo'lmaydi. Birinchi davra o'rtalarida markaziy himoyachilarimiz bir vaqtda jarohat olib qolishdi. Ushbu etishmovchilik bizga katta tasir o'tkazdi. Biz tarkibni moliyaviy imkoniyatlarimizdan kelib chiqib shakllantirganmiz. Bahoni men emas, boshqa insonlar bersin. Mening shaxsiy fikrimcha, o'yinmizdan qoniqmadim.

- "Qo'qon-1912" transferlar oynasida bor-yo'g'i bir futbolchini o'z safiga qo'shib oldi. Jamoangiz transfer bozorida faol emasligi jamoaning moliyaviy holati bilan bog'liqmi?

- Birinchidan biz o'zimizning tarkibimizdagi futbolchilarga ishonch bildirishga davom etyapmiz, ammo hozirgi bir nechta futbolchilar bilan muzokara olib boryapmiz, agar kelisha olsak, ularni o'z safimizga qo'shib olamiz. Superliganing boshqa jamoalari bilan moliyaviy tomondan raqobat qilish qiyin bo'lmoqda, ko'pgina futbolchilar boshqa jamoalarni tanlayapti.

- "Qo'qon-1912" ikkinchi davrada o'z oldiga qanday maqsad qo'ygan?

- Biz ushbu yigitlar bilan dastlabki 5-6 turda yaxshi o'yin namoymish etib keldik. Imkon qadar 10talikdan joy olishga harakat qilamiz. Yigitlarning ham bunga ko'zi etyapti. Ligada jon saqlab qolish uchun kurashish emas, teparoqqa harakat qilamiz.

- Hozirgi kunda barcha jamoalarda hujumchi etishmayotgandek. Ushbu muammoning sababi nimada deb o'ylaysiz?

- Barcha jamoalar himoyalanishni o'rganib oldi. Hozirgi kunda esa individual jihatlama kuchli hujumchilar kamayib ketdi. Avvalari hujumchilar ko'p holatlarda individual mahorat evaziga raqibdan ustun kelar edi.

Bahrom Haydarov: "Imkon qadar 10talikdan o'rin egallashga harakat qilamiz"