Мухлислар футболчиларнинг фаолиятини якунлаганидан сўнг ғалати касбларни танлашига ўрганиб қолишган. Бироқ Англия юқори дивизионидаги ўйинлари билан танилган ушбу футболчи боксдаги дебютида учраган шармандали мағлубиятидан сўнг ўзини ҳеч ким танимаслигини хоҳлаган бўларди.
"Астон Вилла"нинг собиқ юлдузи Росс Маккормак боксдаги илк қадамларини ташлади. Аммо "Лидс Юнайтед"даги собиқ жамоадоши Мэтт Килгаллонга қарши кечган бу жанг у учун унутувга лойиқ тунга айланди. Маккормак "Pro Project Promotions" томонидан ташкил этилган "A Night To Remember II" турнирининг биринчи раундидаёқ нокаутга учради.
2024 йилда фаолиятини якунлаган 39 ёшли собиқ футболчи учун рингдаги оқшом омадсиз келди. У рақибига ўнг қўлида зарба беришга уринган вақтида мағлубиятга юз тутди. Килгаллон зарбадан чапдастлик билан қочиб, бунга жавобан кучли чап илмоқ (ҳук) зарбасини йўллади ва шотландияликни ерга қулатди.
"Daily Mail" нашрининг хабар беришича, Маккормак ринг бурчагига қулаган ва ҳакам саноғи якунлангунга қадар ўрнидан тура олмаган. Бироқ жанг тугагач, у ўзига келиб, собиқ жамоадошини қучоқлаган ҳолда табриклади.
Мазкур мусобақалар "Арсенал" ва "Хиберниан"нинг собиқ дарвозабони Грэм Стэк томонидан ташкил қилинади ҳамда ундан тушган минглаб фунт стерлинг маблағлар хайрия ишларига йўналтирилади.
