Asosiy tarkib azolari ayni damda Chirchiq shahrida yig'in o'tkazmoqda. “Kimyogar” stadioni yaqinida joylashgan “Zerom” mehmonxonasi “burgutlar”ning vaqtinchalik qarorgoh vazifasini o'tab bermoqda. Mashg'ulotlar Orif Mamatkazin boshchiligida o'tkazilmoqda. Unga Vitaliy Legay bilan Server Esetov yaqindan yordam bermoqda. Kuniga ikki mahaldan shug'ullanayotganligini ham qo'shimcha qilish lozim. Jismoniy va taktik yo'nalishlar bo'yicha mashg'ulot o'tkazilmoqda.
Ertaga ushbu yig'in doirasidan o'rin olgan ilk sinov-nazorat uchrashuvi o'tkazaladi. “Bunyodkor” yoshlar jamoasi bu borada sparring-raqib vazifasini o'tab beradi.

Tarkibdagi o'zgarishlar ayni damda muxlislarning diqqat markazida turibdi desak mubolag'a bo'lmaydi. Shu bois birinchi davrani jamoamizda o'tkazgan Nodir Ashurmatov, Tursunboy Husanov, Abdumalik Abdullaev, Otabek Valijonov, G'ulom O'runov, Alisher Shog'ulomov kabi o'yinchilarning jamoadan ketganligini aytish o'tish joizdir. Shuningdek tajribali hujumchilar Nemanya Yovanovich bilan Anvar Berdiev ham ayni damda “Andijon” mashg'ulotlarida ishtirok eta olmayapti.

Tarkibga esa “Navbahor”dan himoyachi Obid Jo'raboev bilan yarim himoyachi Alibobo Rahmatullaev kelib qo'shildi. Shuningdek so'nggi paytlarda “Buxoro” uchun o'ynab kelayotgan Pavel Smolyachenko ham ayni damda “burgutlar”ning o'quv-yig'in mashg'ulotlarida ishtirok etmoqda. Birinchi davrani “Olmaliq”da o'tkazgan markaziy yarim himoyachi Dilshod Jo'raev ham kuni-kecha Chirchiqdagi yig'inga kelib qo'shildi.

Ulardan tashqari xorijlik futbolchilar ham yig'inga taklif etilgan. Moldaviyalik legionerlar ko'rikdan muvaffaqiyatli o'ta olsa, ikkinchi davrani “Andijon”da o'tkazadi.

Ayni damda tarkibni kuchaytirish uchun yana bir qator futbolchilar bilan muzokara olib borilayotganini aytib o'tish lozim. Eslatib o'tamiz, “Andijon”ning Chirchiqdagi yig'ini 25 iyulga qadar davom etadi.

Yoshlar jamoamiz ham Andijonda yig'in o'tkazmoqda. Murabbiy Yodgor Xurxonov ayrim sabablarga ko'ra, endilikda jamoada ishlamaydigan bo'ldi. Shu bois hozir mashg'ulotlar Rasul Rahmonov boshchiligida o'tkazilmoqda. O'ttiz nafar futbolchi mashg'ulotlarda astoydil ter to'kmoqda. Tabiiyki tarkibda yangi o'yinchilar ham bor. Mashg'ulotlar hozircha Oltinko'l tumanidagi “Markaziy” stadionda kuniga bir mahaldan o'tkazilmoqda. Keyingi haftadan boshlab, futbolchilar kuniga ikki mahaldan shug'ullanadi. Yoshlar jamoamiz ham yaqin orada nazorat uchrashuvida maydonga tushishni rejalashtirgan.

“Andijon”: Sakkiz futbolchi ketdi, Rahmatullaev, Smolyachenko, Obod Jo'raboev va Dilshod Jo'raev keldi