- O'yin haqida fikringiz?

- O'yin o'ziga yarasha bosimli kechdi. Ochkolar juda ham zarur paytda tavakkal qilishga harakat qilyapmiz. Boshqalar ham shunday yo'l tutyapti. Chunki dekabrda bo'ladigan pley-off o'yinlarida hech kimning maydonga tushgisi yo'q. Biz oson bo'lmasligini, Kubok finalidan keyin ikki kun ichida tiklanish qiyin bo'lishini bilardik. Futbolchilarimiz qo'ldan kelgancha harakat qilib, o'yinga bor kuchni berishdi. Bu bilan jamoamni tabriklasam bo'ladi. Birinchi bo'lib to'p kiritdik, keyin esa o'tkazib yubordik, lekin na iloji bu futbol. Men "Andijon" bilan bahsda boshqacha tuyg'ularni his qildim: stadiondagi muhit, muxlislarning tinmay olqishlab turishi - bularni paytida o'z boshimdan o'tkazganman. Yana o'sha voqealar esimga tushib ketdi. Bu erga qaytganimdan xursandman.

- Natijadan qoniqdingizmi?

- Yo'q. Chunki har bir o'yinni yutmasak bo'lmaydi. Turnir jadvalidagi holat shuni taqozo qilyapti. Bugun raqib darvozaboni ancha yaxshi harakat qildi. Andijon men uchun qadrdon shahar, ammo to'g'risini aytaman, bu erga yutuqni ko'zlab kelgandik.

- Bugungi o'yinda finaldan keyingi charchoq alomatlari kuzatilgandek bo'ldi.

- Finaldan keyin oradan necha kun o'tdi? Ikki kunmi? Uchinchi kuni maydonga tushyapmiz. Aytganimdek, birdaniga tiklanib olish oson emas. Finalda qancha kuch yo'qotganimizni hamma ko'rdi. Chunki kubokni qo'lga kiritishni astoydil xohlagandik. Natijada shu ikki kun faqat tiklanish bilan kechdi.

- Tabatadze va Amonovni almashtirish sababi?

- Ular ham ikkita o'yinni yaxshi o'tkazishdi. Shu bois bugungi uchrashuvda zaxiraga olib boshqa futbolchilardan foydalandik. Qarshi hujumlarda tez harakat qilamiz degan maqsadda yoshlarni tushirdik.

- "Andijon" klubi siz uchun begona emas. Shunday ekan, jamoaning OCHL 2dagi ishtiroki haqida fikringiz qanday?

- Jamoa uchta o'yin o'tkazib, uch durang qayd etdi. Gol o'tkazmagani va gol urmaganini ham bilaman. Keyingi o'yinlarda imkoniyat yaxshi deb o'ylayman. Muhimi, qo'lni tushirmaslik kerak. Yaqinlashib kelayotgan bahs "Andijon" uchun juda muhim bo'ladi, shu o'yinni yutib olish lozim. Bugun o'zaro o'yinimizdan oldin "Andijon" futbolchilariga shunday dedim: o'tgan yil birgalikda ishlab OCHL 2 yo'llanmasini qo'lga kiritgandik, endi ishqibozlarni yanada xursand qilish uchun yutmasangiz bo'lmaydi. O'ylashimcha, keyingi o'yinlarda albatta g'alaba bo'ladi.

Aleksandr Xomyakov: "Andijon men uchun qadrdon shahar, lekin bu erga yutish uchun kelgandik"