Muxlislarga yaxshi malumki bu yil 1-o'rinni egallagan jamoa to'g'ridan-to'g'ri elitaga yo'l oladi. 2-o'rin sohibi esa reglamentga ko'ra oliy liganing 15-o'rindagi jamoasi bilan pley-off bahsida maydonga tushadi. Ayni damda birinchi liganing ikkita klubi 1-o'rin uchun jiddiy kurashmoqda. “Oq-tepa” va “Obod” o'rtasidagi ochkolar farqi 1tani tashkil etmoqda. Xo'sh, 1-o'ringa bo'lgan imkoniyat kimda yuqoriroq? Shu va boshqa savollarga javob olish maqsadida o'z vaqtida birinchi ligada faoliyat yuritgan Abdusamad Do'rmonov bilan suhbatlashdik.

- Abdusamad aka, birinchi liga o'yinlari ham hademay poyoniga etadi. Nima deb o'ylaysiz, 1-o'rin qaysi jamoaga nasib etarkin?
- Avvalo birinchi ligada ham huddi oliy ligadagi kabi intriga avj olgani ijobiy xol ekanligini takidlab o'tgan bo'lardim. Haqiqatdan ham 1-o'rin egasi katta extimol bilan so'nggi turda aniq bo'ladi. “Oq-tepa” va “Obod” o'zi ishtirok etayotgan chempionatning haqiqiy top klublaridir. Sharoit va tarkib jihatdan ular boshqalardan bir pog'ona ustundir. Savolingizning asosiy qismiga keladigan bo'lsak, menimcha “Obod” bu yil oliy ligaga to'g'ridan-to'g'ri yo'l olsa kerak. Uning qolgan ikki raqibi bu – “Xotira-79” bilan “Kosonsoy”dir. “Oq-tepa” esa “Mashal-2”ni qabul qilib, so'ngra “Xorazm” maydoniga safar uyushtiradi. Urganchliklar ham yaxshi jamoa. Ular ham bejizga 4-o'rinda borayotganini isbotlash uchun so'nggi turda jiddiy qarshilik ko'rsatadi deb o'ylayman. Yana kim biladi deysiz. Bu – futbol. Unda hamma narsa bo'lishi mumkin.

- Poytaxtning ushbu ikki klubini joriy mavsum kuzatdingizmi? O'yin borasida ular qanday?
- Yo'q, unchalik ko'p ham kuzatish imkoni bo'lmadi. “Yozyovon-Lochinlari” jamoasini boshqarayotganimda o'z maydonimizda “Oq-tepa” bilan o'yinda ko'rgandim bu jamoani. “Obod” bilan esa qishda sinov-nazorat bahsida maydonga tushgandik. O'shandayoq bilgandim ularning jamoaviy o'yini yaxshi shakllanganligini.

- Agarda “Oq-tepa” siz aytgandek 2-o'rinni egallasa ular keyin oliy liganing 15-o'rindagi jamoasi bilan pley-off bahsida ishtirok etadi. Bu borada ularning imkoniyati qanday deb o'ylaysiz?
- Elita bilan birinchi liganing farqi bor. To'g'ri, “Oq-tepa” tarkibida ham ilgari bir necha yil oliy ligada o'ynagan yigitlar jamlanishgan. Ammo bugungi kunda oliy liga klublari baribir kuchliroq.

- Umuman olganda bu yilgi birinchi liga chempionati haqida fikringiz qanday?
- Bu erda ham 4ta klub jiddiy kurashmoqda. Yuqorida nomlari keltirib o'tilgan Toshkent klublaridan tashqari “UzDongJu”, “Xorazm” va “NBU-Osiyo” ham yaxshi jamoalardir. Shuningdek “Zomin” ham. “Bankirlar”ning oldiga elitaga chiqish vazifasi qo'yilmagan bo'lsada, ular doim etakchilarga jiddiy qarshilik ko'rsatib keladi. Qolgan klublarning saviyasi deyarli bir xil deyish mumkin.

- Sobiq jamoangiz “Yozyovon-Lochinlari”ning o'yinlarini kuzatib boryapsizmi?
- Deyarli yo'q. Birgina “Mashal-2”ga qashi o'tkazgan bahsiga borib ko'rib keldim. Jamoa debyutant sanaladi. Yigitlar ikkinchi bosqichda yanada o'sishga erishdi deb o'ylayman. Birinchi mavsumidayoq 8-o'rinni egallash menimcha yomon natija bo'lmasa kerak. Mavsum boshida bir qator muammolar yuzaga kelgandi. Endilikda esa hammasi iziga tushib borayotir. Nima bo'lganda ham bu jamoaga omad tilayman.

- Ayni dam o'zingiz qanday yumushlar bilan bandsiz?
- Uydaman. Dam olyapman. Yashirishni keragi yo'q, takliflar bo'lishini kutyapman. Qaysidir jamoa xizmatimga extiyoj sezsa, yordam berishga tayyorman. Murabbiyning qismati shu ekanda, bugun kimgadir keraksan, ertaga esa aksincha.

Islombek Rustambekov suhbatlashdi.

Abdusamad Do'rmonov: “Bu yil oliy ligaga to'g'ridan-to'g'ri “Obod” chiqsa kerak”