Osiyo kubogi-2007. Shackixning hisobga olinmagan goli. Bin Hammamning xati va hakamlar qurboni bo'lgan O'zbekiston

O'shanda terma jamoa ustozi Rauf Inileev tarkibga Pavel Solominni ham jalb qilgan. Hujumchi chorak finalda Saudiya Arabistoni darvozasiga gol urgandi. Solomin 2006 yil 21ta gol bilan O'zbekiston chempionatining to'purari ham bo'lganligini muxlislar yaxshi eslashadi. O'zbekiston terma jamoasining Osiyo Kubogidagi ishtiroki oldidan sobiq futbolchiga bir nechta savollar bilan yuzlandik.

- Pavel Pavlovich bo'lajak Osiyo Kubogida O'zbekiston terma jamoasining imkoniyatlarini qanday baholaysiz? Qaysi bosqichgacha etib bora olamiz?

- Birinchi navbatda terma jamoamizdan yorqin o'yin kutmoqdaman. Men bashorat qilishni yoqtirmayman. Chunki futbolda oldindan nimadir deyish qiyin. Hozirda Osiyoning ko'plab jamoalari kuchaymoqda. Men milliy terma jamoamizning hech bo'lmaganda yarim finalda ko'rishni istardim. Musobaqada oson o'yinlar bo'lmaydi.

- O'zbekiston terma jamoasining qaysi chizig'i kuchli ko'rinmoqda?

- Aslida olib qaraganda barcha chiziqlarda balans bor, deya olaman. Afsuski, Shomurodov safdan chiqdi. Umid qilamanki, u tezroq tuzalib ketadi va jamoaga yordam berishga ulguradi.

- O'zbekiston chempionatidagi hujumchilar muammosi terma jamoaga ham tasir qilyaptimi? Shomurodovning o'rnida kimni asosiy tarkibda ko'ryapsiz?

- Muammo jiddiy. Afsuski, bizda individual kuchli hujumchilar yo'q. Buni Superliga to'purarlari statistikasi tasdiqlaydi. Faqat Oston O'runov bundan mustasno. Terma jamoaga kelsak, bizda yaxshi hujum chizig'i bor. Har bir futbolchi o'yinni o'z qo'liga olishi mumkin. Texnik jihatdan saralangan futbolchilar o'rin olgan. Mantiqan olib qaralganda Shomurodovni Sergeevga almashtirish to'g'riroq bo'ladi. Igor hozir yaxshi holatda va muntazam ravishda gol urmoqda. Bobir Abdixoliqov ham musobaqada porlashi mumkin. Unda gol urish instinkti yaxshi rivojlangan.

- Futbolchilik faoliyatingiz davomida terma jamoada ko'plab uchrashuvlarda maydonga tushgansiz. 2007 yilgi Osiyo Kubogi qanday taassurotlar bilan yodda qolgan?

- Umuman olganda ijobiy taassurotlar bilan yodda qolgan. Tashkilotchilik ham yaxshi darajada bo'lgan. Bu mening faoliyatimdagi ilk katta turnir edi. Yaxshi tajriba olganman. Albatta, alamli lahzalarni ham aytib o'tish kerak. Biz yarim finalga chiqishga haqli edik. Afsuski, voqealar biz istagandek bo'lmagan.

- Keling biroz tarixga qaytsak. O'sha paytlarda "Traktor" ko'p jamoalarga bosh og'riq bo'lardi. Hattoki, O'zbekiston Kubogi finaliga chiqqan, chempionatda esa to'rtinchi o'rinni olgan. "Traktor"ning ustunligi nimada edi?

- Bunda Vadim Abramovning xizmatlari katta edi. U yigitlarni birlashtirgan. Maydonga tushganimizda kim bilan o'ynashimizdan qatiy nazar, o'zimizga ishonardik. O'yinimiz yaxshi edi. Buning natijasida biz kubok finaliga chiqdik. Bizning kuchimiz hamjihatlikda edi. Murabbiylar tomonidan bosim bo'lmagan. Futbolni zavqlanib o'ynardik. Bu omillarning barchasi maydondagi natijalarda aks etgan.

- 2005 yil "Paxtakor"ga o'tdingiz va oradan ko'p o'tmay "Traktor"ga qaytdingiz. "Paxtakor"ga o'tish faoliyatingizni o'zgartirdimi?

- "Paxtakor"ga o'tish shubhasiz foydali bo'lgan. Men katta tajriba orttirdim. Chempion va kubok sohibiga aylandim. Aytish mumkinki, bundan ham yuqori saviyada o'ynashimga ishonch paydo bo'ldi. "Traktor"ga qaytganimda esa men allaqachon boshqa futbolchi edim. "Paxtakor"da olgan tajribam to'purar bo'lishimga yordam berdi.

2007 yilgi Osiyo Kubogi, "Traktor", "Paxtakor" va O'zbekiston terma jamoasi haqida - Pavel Solomin bilan intervyu